Arts figurativis
Docente: Enza Purino
Tutor dal laboratori: Giorgio Gianfranco Pascoli
Program / Contignûts dal laboratori
Il laboratori al propon di doprâ i colôrs in forme artistiche e creative cu la finalitât di sensibiliazâ e disvilupâ lôr cognossince.
L'invît al è chel di sperimentâ il mont cromatic lassantsi cjapâ dal moviment dai stes colôrs, viodûs tant che precisis individualitâts, cuntun moviment interiôr, un lôr caratar, partantju dongje dai suns dal lengaç e/o dai struments musicâi.
I zûcs cromatics a puedin partî des emozions didentri (pôre, gjonde, e v.i.) o da atmosferis difûr (come i colôrs stagjonâi). Si puedin duncje scoltâ i colôrs par sintî ce che a evochin. Si inviarà cussì un zûc di sinestesie cence fin.
Dut chest par jentrâ te essince di une sorte di abecedari dai colôrs e cjapâ sù dutis lis lôr potenzialitâts.
L'obietîf di chescj esercizis al è chel di:
- jessi di supuart al lengaç verbâl;
- jessi di supuart al mont des flabis e des poesiis;
- voltâ cui colôrs la secuence di une conte;
- cjapâ sù lis sfumaduris di difarentis melodiis e suns des variis lenghis.
Il laboratori di piture proponût si fonde su la tecniche dal acuarel su sfuei bagnât, doprant essencis di pigments naturâi. Chest contat artistic si ispire ae Teorie dai Colôrs di Goethe, ae pedagogjie steineriane, fin a aurî i insegnaments dal "Spirituâl tal art" di Wassilly Kandinsky.
